Эхийн сүүгээр хооллолтыг дэмжих дэлхийн долоо хоногт зориулж дараах зөвлөмжийг хүргэж байна. 

Хүүхдийг төрмөгц эхтэй хамт арьс арьсаар шүргэлцүүлэх, төрсний дараа нярайд эхийн ангир уургийг аль болох эрт амлуулах, 6 сар хүртэл нялхсыг эхийн сүүгээр дагнан хооллох, 2 нас хүртэл хүүхдийг хөхөөр үргэлжлүүлэн хооллох нь ач холбогдол өндөртэй.

Хүүхдээ хэрхэн зөв тэврэх вэ? 

• Хүүхдийн толгой их бие нэг шугамд байрласан, хүүхдийн толгой бага зэрэг арагш гэдийсэн байна.
• Хүүхэд бүх биеэрээ эхийн хөх рүү харсан байна.
• Хүүхэд эхийн биед наалдсан байна.
• Эх хүүхдийн бүх биеийг тулж тэвэрсэн байна.

Хөхөө хэрхэн зөв амлуулах вэ?

• Хүүхэд амаа том ангайсан.
• Хөхний толгой ба нөсөөт хэсгийн ихэнхийг үмхсэн байна.
• Хүүхдийн доод уруул гадагш цорвойсон.
• Хүүхдийн доод эрүү эхийн хөхөнд хүрсэн байна.

Хөхний сүү ямар ач холбогдолтой вэ?

• Байгалийн дархлаа өгнө- Хүүхдийг халдварт өвчнөөс хамгаална.
• Хоол тэжээлийн төгс бүрэлдэхүүн- Нярай болон хүүхдэд хэрэгтэй бүх шимт бодис агуулагддаг.
• Ээж бүрийн сүү өөрийн хүүхдэд зориулагдсан байдаг.
• Хүүхдийн хоол боловсруулах тогтолцоонд хамгийн тохиромжтой.
• Хүүхдийн оюун ухаан болон мэдрэлийн хөгжилд сайнаар нөлөөлнө.
• Хүүхдийн жинг зөв зохицуулна.
• Хүүхдийг хэт таргалах эсвэл турахаас сэргийлэх ач тустай.

Хөхөөр хооллох нь ээжид ямар ач холбогдолтой вэ?

• Эхийн умай агшиж, хурдан хэвийн байдалдаа ороход тусалдаг.
• Жин хасахад тусална.
• Сэтгэл санааг тайвшруулж, төрсний дараах сэтгэл гутралыг багасгадаг.
• Хөх, умайн хорт хавдрын эрсдэлийг бууруулдаг.

Хөхөөр хооллох боломжгүй үед яах вэ?

Нярайг аяга халбагаар хооллоорой. Энэ нь:

• Хөхний сүүгээр үргэлжлүүлэн хооллох боломжоор хангана.
• Аюулгүй, амьсгалах, залгих үйлдлийг зохицуулахад тохиромжтой.
• Халдварын эрсдэл бага
• Хэн ч хооллож боломжтой.

Хөхөөр хооллосон хүүхэд

• Халдварт өвчинд бага өртдөг.
• Суулгалт багатай
• IQ танин мэдэхгүйн чадамж өндөр байх магадлалтай.
• Сэтгэлзүйн хувьд тогтвортой, тайван байдаг.
• Хөх сорох үйлдэл амны булчинг хөгжүүлнэ.

Хөхөөр хооллоогүй хүүхэд

• Хэт жин нэмэх, эсвэл жин бага байдаг
• Амьсгалын замын халдвар, гэдэсний халдвараар илүү өвддөг.
• Судалгаагаар танин мэдэхгүй IQ бага байдаг.
• Илүү их уйлагнаж тайван бус байна.

Хөхөөр хооллох нь хүүхдийг эрүүл чийрэг өсөж торниход хамгийн чухал боловч дэлхий дээрх  6 сар хүртэлх хүүхдүүдийн талаас бага хувь нь хөхөөр хооллодог. Иймд та бүгд хүүхэд бүрийг хөхөөр хооллож эрүүл чийрэг иргэн болоход өөрийн хувь нэмрээ оруулаарай.